تسليط ضوء على بعض الجوانب والصعوبات في السنة التحضيرية

السلام عليكم ورحمة الله وبركاته...

 بعد التدوينتين الأولى اللي تخص التحضيري بشكل عام ، فيه من طلبني بتويتر والاسك اكتب تدوينة بالتفاصيل عن بعض الشغلات اللي تطرقت لها بالخفيف في التدوينتين كـتجربتي الشخصية بالمسار الصحي والصعوبات اللي ممكن تلقونها بمشواركم وأرى إني كررت الكثير بس اعذروني ولكن لربما تفيدكم... 

قررت أكتب عن خمس نقاط كثير أنسألت عنها وحبيت أحصرها بتدوينة واحدة وأدري تأخرت فيها، وهالنقاط:

1- التجربة الشخصية

2- الوقت

3- روتيني الدراسي

4-الضغوط

5- التخصص " نصائح من التدوينة السابقة تلخص التحضيري كامل"

ــــــــــــــــــــــــــــــــــــــــــــــــــــــــــــــــــــــــــــــــــــــ

1- التجربة الشخصية: 

مؤمنة إيمان تام أنه لكل شخص تجربة ورحلة خاصة فيه، نظرة خاصة به، وأثر وفائدة بها يقدر يطور نفسه وممكن يفيد غيره. 

ومن هذا المنطلق أكلمكم، راح أشاركم كل ما هو فيه فائدة لكم وممكن يساعدكم بمشواركم.في تجربتي أنا مريت بالحلو والمر، كان لي انطباعات خاصة تجاه شغلات وتغيرت بعد ما خلصت السنة، وفيه شغلات عانيت منها بينما الغالب ما يعاني منها، فالفكرة أنه لا تسبقوا الأحداث وعيشوا تجربتكم أنتم بتفاصيلها الخاصة بكم، لأن ممكن تسمعوا تجربة شخص ما أعطى هالسنة جهده وبتلقونه يتحلطم ويقول كل شيء صعب وهذا الشيء بيأثر عليكم من قبل لا تجربوا وبتشوفوا كل شيء صعب.

اعرفوا شغلة أغلب اللي بتدرسونه بالتحضيري نفسه درستوه بالثانوي بس بلغة انجليزية وشوية تفاصيل جديدة بشكل أعمق. كمية المحاضرات تعتبر حلوه، بس بسبب النقلة الجامعية بتحسوا شوي بلخبطة ثم بتضبطون نظامكم. ودسامة المحاضرات بتتغير الترم الثاني وتصير أكبر "بس ما عليكم حلوة وخاصة البايولوجي وبتستمتعوا".

أخيرًا، ادعوا ربكم ييسر لكم ويسخر لكم صحبة صالحة تعينكم وتعينوهم، ومن أكبر الجوانب الإيجابية بالتحضيري إني طلعت بصداقات جميلة والله يديمها، فانتقوا صحبتكم صح.

ــــــــــــــــــــــــــــــــــــــــــــــــــــــــــــــــــــــــــــــــــــــــ

2- الوقت:

أسئلة كثير لقيتها بهالصيغة " كيف الوقت كان يكفيكم تذاكرون يعني ما بأقدر أقعد مع أهلي؟"
الجواب باذن الله ربي يقدر يبارك لكم بوقتكم. دوامكم من 8 إلى 5 وأوقات تطلعوا بدري إذا مافي لاب أو ما عندكم محاضرة انقلش، وأوقات تداوموا من 10 عشان ما عندكم أنقلش الصباح فبيصير فراغات كثيرة ممكن تستغلوها. غير أنه عندكم من 6 إلى 6 الصبح بالبيت تقدروا تاخذوا منها 8 ساعات نوم واربع لدراستكم وأهلكم وحياتكم أو لو 10 نوم إذا اجهدتوا وتظل ساعتين فيهم بركة " بس الأفضل أنكم تعودون نفسكم على ساعات محددة بالنوم ولا تكثرون لان بصيروا تنعسون إذا ما نمتم كثير". وصح أول 6 أسابيع تقريبًا عندكم 3 ساعات فراغ كل ثلاثاء للأنشطة تقدروا تستثمروها.

 صحيح أول أسبوع بيكون جهددد أنكم تقاوموا النوم وبتنعسوا كثيير، وهذا الشيء بتتعودوا عليه مع الأيام ويصير شيء طبيعي، وثقوا تمامًا أنه هالشيء بيفيدكم للسنوات المقبلة بحيث أنكم تعودوا نفسكم تستقبلوا كم كبير من المعلومات لساعات طويلة. ولا تنسوا الجمعة والسبت فيهم بركة تخليكم تنجزوا الكثير.لا تحطوا الوقت عائق، لأنه شغلة بتتعودوا عليها مع الأيام، وعودوا نفسكم على شيء يتناسب مع شخصياتكم والجامعة + استثمروا أي فراغ بالجامعة لأنكم نشيطين فترة النهار.

ـــــــــــــــــــــــــــــــــــــــــــــــــــــــــــــــ

3- روتيني الدراسي:

بأذكرأجابة لي لسؤال جاني بالأسك: رحاب ممكن تقوليلنا روتينك ايام التحضيري؟؟

 وأرد لكل شخص روتين بيرسى عليه بعد ما يضبط نظامه أول أسبوعين 💔 الدوام طويل ومجتمع جديد ولغة غير، تحتاسون وبتلقوا الروتين اللي يناسبكم✨💜 بالنسبة لي كنت أحب اخصص أيام الاسبوع لكتابة الملخصات والاسايمنتات ومذاكرة المواد اللي ما يحتاج لها فهم كثير ، أقوي لغتي، أترجم، اقرأ المحاضرات، اذاكر للكويزات الخفيفة ، اشتغل على تكليف ، اذاكر لاب، يعني بسبب الدوام الطويل كنت اخلي ايام الاسبوع وفراغات الجامعة للشغلات اللي ما تحتاج جهد تركيز ومذاكرة ، وإن كان يومي خفيف أو قصير اذاكرمحاضرة باخر اليوم ، وكنت أحب اذاكر الحاسب بوسط الاسبوع وتخفف ضغط الويكند .  وعودت نفسي ببعض الأيام أنه ما انام العصر أو المغرب لاني من الفئة النهارية وما أعرف أذاكر آخر الليل إلا اذا اضطريت💔 بينما الكثير من اللي اعرفهم كان بالعكس ينام ويقوم الليل يذاكر🤔👌🏻لذلك أقول دايم اختاروا روتينكم الخاص بكم♥️، وكنت أخصص ايام الويكند لمذاكرة المواد العلمية والمحاضرات والمهام الدسمة 📝📚وخلوا لكم متسع بالحياة تفرغون فيه القلق والمخاوف وعشان تتجددوا بعد كل جهد تبذلونه✨😍

أول أسبوعين جربوا أكثر من روتين وشوفوا ايش يتناسبكم، فيه ناس كانت تنام أول ما ترجع البيت ويقوموا 12 أو 1 ويذاكروا للفجر ثم يناموا ويداوموا، وفيه البعض يخلي الويكند للمهام والاسايمنتات، جربوا وشوفوا أو ابتكروا نظامكم أنتم.

بالإضافة أنه بأتكلم عن الدراسة وطرقها، طريقة الدراسة تعتمد أيضًا على شخصيتك، الناس تختلف فيه شخصيات بصرية تحب تشوف فيديوهات وصور تثبت الفهم، وفي ناس سمعية وتحب تسمع شروحات، والبعض يحب يكتب ويسوي مخططات وتلخيصات، وناس تحب ترسم، وفيه من يحب يذاكر من ورق ومن يحب يذاكر من جهاز وغيره من اصناف الناس، لذلك لا تضيعون جهدكم في طرق ما تناسب شخصياتكم وبالعكس استغلوا مهاراتكم في المذاكرة بشكل فعّال.تعلموا تاخذون ملاحظات وفكروا بالمعلومة بكل نواحيها واربطوها بالمعارف السابقة عشان تقدروا تخمنوا الأسئلة كيف ممكن تكون وكيف تحلوها.

وكطريقة فعّالة للمذاكرة كنت أطبقها أوقات وجد تركز المعلومة: حاولوا أول ما تحمّلوا السلايدز حق المحاضرة تقروها بشكل سرييييع وتترجموا كم كلمة لو احتجتوا، وبعد المحاضرة اقروها من جديد بتمعن واقروا ملاحظات الدكتور أو الدكتورة اللي كتبتوه بالشرح، ونهاية الويكند تذاكرون السلايدز وملاحظاته مذاكرة مركزة مع الكتاب إن كانت مادة تستلزم الكتاب ، وقبل الامتحان ترجعون تذاكرونها، كذا المعلومة مرت عليكم 4 مرات وبتسهل عليكم. 

أخيرًا، المذاكرة الجامعية حلوه في الشرح لبعض ومراجعة نهائية فقط لكن عن نفسي صعب تكون المذاكرة المركزة جماعية بس حلو تراجعون سوا بعد المذاكرة الفردية.

ـــــــــــــــــــــــــــــــــــــــــــــــــــــــــــــــــــــــــــ

4-الضغوط:

التحضيري مو ضغط دراسي قد ما هو ضغط نفسي تحاولون فيه انكم تاخذوا معدل عالي عشان تحققون حلمكم بالتخصص اللي تبغونه👌🏻لانه صراحةً عدد المحاضرات العلمية قليل بالاسبوع نفس ما ذكرت سابقًا✨، الضغط النفسي ممكن يتحول دراسي اذا أثر عليك في المذاكرة لذلك دائمًا استثمروا هذا الضغط بشكل ايجابي وخلوه دافع لكم لتحقيق الحلم💜

أيضًا التحضيري ممكن يكون ضغط دراسي ببداية السنة للي لغتهم شوي ضعيفة وبعدين بيتغلبوا عليه وبيشوفوا المحاضرات سهلة واللغة كذلك🙆🏻‍♀️، وبتعانون من الضغط إن كنتم تفكرون طول الوقت بشكل تنافسي.

بالإضافة إلى أنه ممكن الضغط ينتج بسبب عدم فهمكم من الدكتور، فهنا نلجأ لدكتور ثاني بساعاته المكتبية أو بمصادر التعلم.

وأهم شي ممكن يكون ضغط دراسي ونفسي للي يراكم المحاضرات والشغلات اللي لازم يسلمها، عشان كذا دائمًا أقول سووا مهامكم أول بأول وارتاحوا👌🏻✨ مثلًا الرايتنق دائمًا اكتبوه بكلاس الانقلش الخاص بالرايتنق وارجعوا البيت نقحوه واطبعوه وخلوا الدكتورة تشوفه بعدين نقحوه وارسلوه بالبلاك بورد وكذا ما تضيعون وقتكم ويصير لكم متسع ممكن تسووا فيه أي شيء (طلعة، تقروا كتاب،...) ،وصح حاولوا تسمّعوا القران دائمًا من بداية الترم واستغلوا فراغات الجامعة دائمًا للتكليفات لأن بالنسبة لي هي أساس الضغوط إن تراكمت.

طيب كيف تتكيفون مع الضغط؟ دائمًا أقضوا على مسبب الضغط، يعني إن كان الضغط بسبب الدكتور روحوا لدكتور ثاني، إن كان بسبب صداقاتكم ..عالجوها أو ابتعدوا لفترة، إن كان بسبب نفسي مو مشكلة لو طلعتم ساعتين تصفوا فيها ذهنكم وترجعوا بنشاط أكبر يساعدكم تبذلوا مجهود أكبر، إن كان بسبب دراسي ممكن غفوة تريحكم بعد المجهود،
و اسمعوا القرآن، مارسوا رياضة، هواية، أكل. وقبل كل شيء لا تنسوا تستعينوا بالله وترجعون له ورددوا " إن مع العسر يسرًا"،  "وما توفيقي إلا بالله عليه توكلت وإليه أنيب"
وأهم شيء يساعدكم على إدارة الضغوط هو تنظيم الوقت وترك التسوييف.

ــــــــــــــــــــــــــــــــــــــــــــــــــــــــــــــــــــــــــــــــــــ

5- التخصص:

بأرجع أعيد النصائح اللي ذكرتهم بالتدوينة السابقة، وهم خطوات لو التزمتم عليها بعد توفيق الله راح تدخلون التخصص اللي تبغونه.

1. اخلصوا نيتكم لله..
2.  اسعوا لحلمكم بأكبر جهد ربي اعطاكم اياه ... "لا يكلف الله نفسًا إلا وسعها"
3.  لكل من خاف من إنه أغلب المناهج باللغة الانجليزية أحب أقولكم أنها أسهل من مذاكرتها بالعربي واللغة ما فيها أي صعوبة..، وأكثر مادة ممكن تستصعبوها بسبب لغتها هي الانقلش نفسه أما المواد العلمية لغتها سهلة جدًا والكل تعود عليها حتى اللي لغته ضعيفة.
4. أول كم محاضرة بتلقوا نفسكم تترجمون كل كلمة! عادي جدًا.. ومع الوقت ما راح تترجموا إلا كلمة أو كلمتين...
5. حاولوا أول ما تحملوا المحاضرة تقروها بشكل سرييييع وتترجموا كم كلمة لو احتجتوا، وبعد المحاضرة اقروها من جديد بتمعن واقروا شرح الدكتور أو الدكتورة اللي كتبتوه بالشرح، ونهاية الويكند تذاكرون المحاضرة مذاكرة مركزة. 
6.  المواد العلمية ما تتراكم أبدًا، خاصة الفيزياء والأحياء، تتذاكر أسبوعيًا مع كل محاضرة تراجعوها، والفيزياء حلوا أسئلتها أول بأول ولا راح تتراكم بشكل ما يوصف، بالنسبة للكيمياء منهج الترم الثاني ما يتراكم، أما الترم الأول فهو سهل وبسيط.
7. من المواد اللي ما كنت أراكمها عن نفسي هو الحاسب، لأنه مادة حفظ وحلو لو يتقسم ويتذاكر أسبوعي بعد.
8. استفيدوا من أخطاؤكم وصححوها واستثمروا أوقاتكم.
9. لا تتحطموا من أول اختبار بالعكس شوفوا الجانب المشرق وافهموا كيف القسم يفكر وكيف يصيغ أسئلته عشان يفيدكم بالاختبار الجاي وتعوضوا نقصكم.
10. الكويزات والاختبارات فرصة حلوه أنه تذاكرون جزء من المادة يرحمكم من مذاكرته بالفاينل، فحاولوا تذاكرونه بشكل ممتاز يغنيكم عن المذاكرة مرة ثانية بالنهائي وفقط تراجعونهم بأقل وقت لان قد اختبرتم فيه أول وصميتوه. وركزوا فاللي ما اختبرتم فيه.
11. خلوا لكم دفتر تذكيرات أو بتقويم الجوال.
12. استفيدوا من الساعات المكتبية للدكاترة ومركز مصادر التعلم.
13. لا تستحوا تسألوا أي سؤال أبببدًا، بالعكس السؤال يفيدكم.
14. حاولوا تخلوا لكم بصمة في التحضيري، ولو كان ملخص سويتوه للدفعة أو أثر تركتوه في صحبتكم.
15. سووا الأسايمنت أو الواجب والحملة وغيره قبل وقت طويل من الdeadline  أو موعد التسليم عشان ترتاحون من الضغط والهم وممكن تاخذوا feedback من الدكتور يفيدكم قبل لا تسلمونه ناقص.
16. مجتمع الجامعة فيه كل الأصناف، فانتقوا صحبة تعينكم على الخير والعلم، الله يرزقكم صحبة صالحة.
17. شخصيًا ما أحب المذاكرة الجماعية، لكن أحب المراجعة الجماعية والشرح لبعض مرره تثبت المعلومة.
18. التحضيري سنة تضيع من عمركم بلا تخصص، صح ! لكن بتأهلكم كثييير لكل سنواتكم اللي بتقضوها بالجامعة، فيها بتكتشفوا نفسكم، وتعرفوا الطرق المناسبة لشخصيتكم في المذاكرة، بتعرفوا كيف بتنظموا وقتكم، كيف تتعاملوا مع الضغط، فاستفيدوا منها.
19. بتلقون ناس شاطرة بس لا تقارنون نفسكم بهم، وإنما قارنوا نفسكم اليوم بنفسكم بداية السنة أو الشهر أو حتى أمس.
20. لا تتأثرون بكلام اللي أكبر منكم في مواد معينة، كل واحد له قدراته، وبعد لا تتأثروا بكلام اللي معكم لأن يمكن يحطمكم، بس خذوا حذركم من هالمواد وانتبهوا لها.
21.  أهم نصيحة: أنتم بسنة تنافسية صحيح! لكن لا تجعلوا المنافسة شغلكم الشاغل، ساعدوا غيركم ولا تكتموا أي علم يوصلكم، علموا فيه غيركم وساعدوهم، وربي بيعوضكم كثييير، حبوا الخير لبعض وتمنوا أنكم ما تفترقوا، لا تبخلوا بأي معلومة على بعض. اعرفوا انه ربي بيساعدكم وتذكروا: "والله في عون العبد ما كان العبد في عون أخيه"

وتذكروا أنه أي تخصص بتدخلونه هو خير لكم لأن ربي اختاره لكم وهو أعلم منكم بأنفسكم وايش يناسبكم.
ــــــــــــــــــــــــــــــــــــــــــــــــــــــــــــــــــــــــــــــــ

ملاحظة💓: استخدامي لأسلوب المخاطبة هو تنويه لشغلات سويتها واستفدت منها أو هو نتاج أخطاء سويتها وكتبت لكم اللي تعلمته منها، فأبغى منكم تنتبهون لهالشغلات...
ــــــــــــــــــــــــــــــــــــــــــــــــــــــــــــــــــ

أنا:💓

رحاب الغامدي... طالبة طب وجراحة218.. 💉

مستعدة للإجابة على كل الاستفسارات إن شاء الله ولاقتراحاتكم...

Twitter: @rehabalghamdi2

  Ask: @RehabAlghamdi2

تم بحمد الله.... 

"إن أصبت فهو من الله وإن إخطأت فمن نفسي ومن الشيطان" 

وفقكم الله لما يحب ويرضى.. وجعل النجاح في طريقكم 

راجية القبول والانتفاع...